Print

بقلم / نوارة أحمد فؤاد نجم
راجل
اتغاظ من مراته وحب يخلص منها
اسلم وراح اتجوز واحدة مسلمة
وبعدين رجع للمسيحية تاني فمراته
رفعت عليه قضية طلاق عشان هي مش على قد ايده
قوم رجع للاسلام تاني عشان يطلبها في الطاعة

سبع سنين مبهدل ام ولاده حابسها على ذمته
وهي مش عايزاه
وما صرفش على ولاده خمسين قرش
ما فكرش مرة يروح يشوفهم
ولا حتى من ورا الام في المدرسة
وجاب لابنه الكبير حكم بالحبس
ولما لقى الست زي الفل
مربية ولادها احسن تربية
وولادها متفوقين وممتازين واخلاق
ليه وليه بقى؟
لازم يثبت لها انه من ساعة ما سابها العيال
مستقبلهم ضاع
تتصرف كيف يا عب رحيم تتصرف كيف يا عب رحيم
بعت ابوه جد الاولاد
- اللي هو ما زال مسيحي -
عشان يغير ديانة ولاده من مسيحيين لمسلمين
يعني حتى لما حب يغير ديانة ولاده
ما كلفش خاطره يغيرها بنفسه
كل ده ليه؟ عشان يقهر الست
اندرو وماريو كانوا امبارح مع منى الشاذلي
في العاشرة مساء
ما شاء الله عليهم وعلى تربيتهم وذكاءهم واخلاقهم
ومبدئيتهم
ما شاء الله على الام المحترمة الفاضلة الذكية
اللي فاهمة الاسلام اكتر من دكتورة الفقه
عارفين مشكلة اندرو وماريو ايه؟
انهم زي ما بيحترموا مسيحييتهم
بيحترموا الديانة الاسلامية
بيتعاملوا معاها على انها عقيدة وايمان
مش على انها كلمتين يطرشوهم في ورقة الاجابة
ويروحوا
امهم معلماهم ان الدين
- اي دين -
لازم يكون مبني على الاقتناع والعقيدة
امهم معلماهم انهم لو ما احترموش دين غيرهم
مش ممكن يحترموا دينهم
اندرو وماريو لو متعصبين
لو بيبصوا للاسلام على انه كلام فارغ
كانوا اتعاملوا معاه على انه كلام فارغ
كانوا طرشوا كلمتين من اللي بيسمعوهم في التلفزيون
وكتبوها في ورقة الامتحان
كانوا عملوا بنصيحة دكتورة الفقه
سعاد صالح اللي قالتهم قضوها سنتين مسلمين
لحد سن التخيير وارجعوا مسيحيين
كأنها بتقول لهم قضوها اشتغلات لحد ما تتجوزوا وتتظبطوا
معلش بقى للي بيحرج من قلة ادبي
بس دي زي دي بالظبط
بالظبط
ما فهمتش يعني ايه قضوها
قضوها؟
طيب الراجل ده اللي اربأ بالابوة انها تنسب له
عايز يكسر الام ويحرق قلبها على ولادها
ومستقبلهم
طيب واحنا؟
احنا عايزين ايه؟
ولدين زي القمر
في منتهى الذكاء
ومنتهى العدالة
ومنتهى الصدق والامانة
يعلموا اتخن تخين ازاي يبقى محترم
ازاي يبقى راجل وياخد موقف ويدفع تمنه
عايزين منهم ايه؟
عايزين يربوا في ولدين لسة عندهم
تلاتاشر سنة
النفاق والكذب والجبن
عايزين نعلمهم يمشوا حالهم ولو بازدراء الاديان؟
ايوة ده ازدراء اديان
هو ده ازدراء الاديان اللي على اصله وللا بلاش
لما اتعامل مع مادة الدين على انها كلمتين
ح اقضيها سنتين
لكن اللي في قلبي في قلبي
ده معناه ايه؟
لو اندرو وماريو سمعوا نصيحة الدكتورة سعاد صالح
وجاوبوا في ورقة الديانة الاسلامية
يبقوا فوق انهم منافقين
كمان بيحتقروا الديانة الاسلامية
وواحد يبعت رسالة يقول الست دي مربية ولادها على العند؟
لا العفو
الاصول تربي ولادها على النفاق والتزوير
والجبن
الاصول تعلمهم ازاي يمشوا حالهم بالنصب
الاصول تكسر مناخير ولادها وتذلهم
اكتر حتة ضحكتني لما واحدة اتصلت وقالت
امهم ساقياهم المسيحية
انا كنت ح اقع على ضهري من الضحك
دي ناقص تقول امهم مدسوسة عليهم
وكويس انها ما قالتش امريكا دافعة لها فلوس
عشان تعلم ولادها دينهم
===
الام الفاضلة المحترمة
والدة اندرو وماريو
عرفت تخليهم رجالة صحيح
والله ماشاء الله عندهم تلاتاشر سنة
ومنى بتحاورهم كأنها بتكلم رجالة كبار
والله في كل الرجالة الكبار اللي شفتهم
ما شفتش ارجل من العيلين دول
عشان ايه عايزين نكسر مناخيرهم ونذلهم؟
عشان ايه عايزين نعمل منهم كدابين ومنافقين؟
بمنتهى البجاحة نقول لهم مشوا حالكوا
!!!!!!!!!!!!!!!
الام دي سألت سؤال
دكتورة الفقه ما عرفتش تجاوب عليه
قالت: حد يجيب لي دليل شرعي من الاسلام
ان الدين يورث
ده الابن اللي بيبقى مولود في اسرة مسلمة
طول ما الاسرة مسئولة عنه بيبقى مسلم حكما
لما بيبلغ العقل لازم يجدد ايمانه ويبقى مسلم
وجوبا
صح
كلامها اصاب كبد الحقيقة والست قارية في الفقه
ودارساه
مش مذاكراه وطارشاه في ورقة الامتحان
مين قال ان الاب
حتى لو كان مؤمن فعلا بالاسلام
لما يغير دينه للاسلام الاولاد يتبعوه
امال سيدنا ابو بكر اسلم
وابنه كان وثني بقى مش مسيحي
ولم يتبع ابوه ازاي؟
واذا كان الولاد عندهم تلاتاشر سنة
وبيقول انا ارفض الاسلام كديانة
هو احنا ايه؟
ما عندناش دم؟
ما عندناش احساس؟
ما عندناش كرامة؟
ما بنخافش من ربنا؟
لما نوصل طفل انه يقول كلمة زي دي
وبعد ما يقول كده نقول له قضيها سنتين مسلم
مش فاهمة ازاي؟
يا اخوانا انتوا ما بتحسوش؟
ده انا الكلمة اللي قالها الولد دي
"ارفض الاسلام كديانة"
ضربت في قلبي زي الرصاص
هو ايه الاستمتاع باهانة الدين دي واذلال الناس كده؟
نصر حامد ابو زيد يقول انا مسلم
نقول له لا مش مسلم
واحد شيعي يقول انا مسلم
نقول له لا مش مسلم
بهائي او مسيحي
يقول انا مش مسلم
نقول له لا انت مسلم
المهم يبقى الدين عافية وخلاص
المسلم مش مسلم
واللي مش مسلم مسلم
كده بلطجة
وكله نلزقه في الشريعة
انا استغربت جدا وبقيت اضرب كف على كف
والدة اندرو وماريو بتدافع عن الشريعة
الاسلامية
وسعاد صالح هي اللي بتورط الشريعة في حاجة مش منها
والدة اندرو وماريو جابت من الشريعة
ادلة عقلية ونقلية
وسعاد صالح ما جابتش ولا دليل على كلامها
كل اللي قالته: قضوها
اندرو وماريو ووالدتهم
بيحترموا الاسلام وبيبصوا له كعقيدة
ودكتورة الفقه شايفاه
"تقضية"
====
الحقيقة انا انبهرت بذكاء وثقافة ام الولدين
والظاهر ده اللي غاظ جوزها منها
اصل
no offence
مافيش حاجة تكيد الراجل
والراجل المصري بالذات
غير ان مراته تبقى ذكية
بيبقى نفسه يفرمها تحت عجلة القطر
الست قالت كلمة والله
جزاها الله كل خير عليها
الست في دفاعها عن الاسلام
والغريب انها هي الوحيدة اللي دافعت عن الاسلام
قالت: لو ده اب مسلم مؤمن صحيح
كان احتضن ولاده وسقاهم الاسلام حتة حتة
لحد ما يحبوه وهم نفسهم يبقوا عايزين يبقوا مسلمين
لكنه منافق ومتلاعب بالاديان
بدليل انه سابهم سبع سنين ما يعرفش عنهم حاجة
!!!!!!!
ماذا اقول بعد كل ما قد قيل
على رأي غادة
يعني يوم ما واحد مسيحي يسلم
يبقى سقط المسيحيين
ده ايه البخت ده يا ربي
هو احنا ناقصين مصايب
ما كفاية المصايب اللي عندنا
====
انا انحني اجلالا واحتراما
للام
المدسوسة على ولادها عشان تعلمهم دينهم
لا رمتهم في الشارع
ولا ودتهم صالة ديسكو
ودتهم الكنيسة
وعملتهم رجالة
ومتفوقين
انحني اجلالا واحتراما
للرجلين الصغيرين
اندرو وماريو
اللي اتربوا على احترام الاخرين
عشان يحفظوا لنفسهم احترامهم
الولدين ما غلطوش في اي حد
حتى المدرسة
قالوا عن ناظر المدرسة والمدرسين
ان كلهم معاهم وكلهم متعاطفين معاهم
بس معلش
مع احترامي لادب اندرو وماريو
القضية لسة في المحاكم
ولسة لم يفصل فيها
كان المفروض ان يبقى الوضع على ماهو عليه
لحد ما يفصل في الامر قضائيا
لكن ان المدرسة تاخد اجراء زي ده
في قضية لم يبت فيها بعد
دي حاجة تثير الشكوك
=====
مش بس موقف المدرسة هو اللي بيثير الشكوك
كل البوليكة دي تثير الشكوك
بقى هالله هالله ع الجد والجد هالله هالله عليه
ما بقالنا الف وربعميت سنة
والناس بتدخل الاسلام
ومن ساعة ما ربنا خلق الاسلام
وفيه ناس بتدخله
ستات ورجالة
وبتضحي في سبيل ايمانها
باسرتها
والراجل بيسلم ويسيب مراته وعياله
ويحاول يشوف عياله
وعياله ما يرضوش يشوفوه
والقصص اللي احنا عارفينها دي
عمرنا ما سمعنا عن واحد اسلم
وكتب عياله المسيحيين وللا اليهود
على دينه وهم مش مقتنعين
لمجرد انه اسلم
عمرنا ما سمعنا عن واحد يقول انا مش مسلم
ويتكتب مسلم غصبانية واقتدار
كل الافلام دي جديدة نوفي
وباقول انها افلام
وقع ضحيتها ناس ابرياء كتير
ومنهم هذه السيدة الفاضلة
والاولادها الرائعين
وحتى الخرنج ابوهم
طبعا اللي انا ح اقوله ده
ناس كتير ح تتهمني بالجنان بسببه
بس تفوا في وشي
غرقوا وشي تفافة ان ما كانتش هي دي الحقيقة
:اسمعوا
بقى الدولة بالذات في عهد مبارك
بتعتمد اسلوب معين في تغيير الواقع
بدل ما يعمل زي ناصر والسادات
يصحى الصبح يفرض على الناس
تغيير ويعمل استفساء تكون نتيجته
تسعة وتسعين وتسعة وتسعين من مية في المية
ويقول على الواحد من مية في المية دول: انا
عارفهم واحد واحد بالاسم
بقى يستخدم اسلوب جديد
يعني مثلا الفلاحين مصممين يزرعوا
قطن والدولة مش عايزاهم يزرعوا قطن
بدل ما تطلع فرمان
تيجي سنة تملا لهم القطن بالدودة
السنة اللي بعدها تطلع لهم القطن اصفر
السنة اللي بعدها القطن ما يطلعش خالص
وابقى قابلني ع الناصية لو فلاح زرع قطن تاني
السنة الجاية
الدولة عايزة تغير المادة التانية
الا وهي ان الاسلام مصدر اساسي للتشريع
لو غيرتها النهاردة
الناس ح تقول الكفرة الفجرة
وحتى المسيحيين مش ح يقدروا يقروا قرار زي ده
قوم تعمل ايه: مش دي الشريعة اللي انتوا عايزينها؟
طيب باسم الشريعة تسلخ وش المواطنين
بالذات المسيحيين
وتطلع تلاتين اللي جابوهم
وتكفر المسلم
وتأسلم المسيحي
وتبغبغ اللخبطان
ولله الحمد والمنة
عندنا بين صفوف المسلمين من يتمتعون
بعبقرية الغباء والجهل والتعصب
مجتمعين
واول ما يلاقوا الدولة بتكفر حد
هيييييييييييييييه
بتجبر حد على الاسلام
هييييييييييييييييييه
بتسجن حد بتهمة ازدراء اديان
هيييييييييييييييه
شوية شوية وبعدين الشريعة
اللي حولتها الحكومة الى ساطور
ح تندار على اللي بيقولوا هييييه
سنتين تلاتة بالكتير
والناس هي اللي ح تقول: نحب على ايديكم
ارحمونا من المادة التانية وشيلوها
في الحالة دي
وبعد تشويه الاسلام وتأليف اسلام جديد
عمرنا ما سمعنا عنه
تبقى الدولة شالت المادة التانية بناء على طلب الجماهير
والحقيقة بقى
انا عايزة المادة التانية تتشال
لان مافيش حاجة اسمها : مصدر اساسي للتشريع
او حتى المصدر الاساسي للتشريع
ما هي يا اما دولة مسلمة
بتقيم العدل والاحسان وايتاء ذي القربي
وترحم ابونا من الفحشاء والمنكر والبغي
يا اما مش دولة مسلمة خالص
انما هذا الموقف المخنث من التشريع الاسلامي
لا هو اسلام ولا هو بتنجان
بس كل واحد يحب يطلع قانون قمعي
يمسح برابيره في فوطة الاسلام
====
فيه كتاب ضاع مني اسمه القضاء في الاسلام
عارض قضايا كتير وعارض ازاي ان القاضي
مسموح له يجتهد بما يتفق مع روح الشريعة
اذا لم يجد نصا واضحا
من ضمن القضايا على ما اذكر
طفل كان متنازع على حضانته
ما بين واحد مسلم كان ح يخليه عنده عبد
وواحد مسيحي كان ح يحرره ويتبناه
قام القاضي المسلم حكم للمسيحي
بالحضانة وقال في حيثياته
ما معناه: ان الحرية تضمن للانسان
ان يكون عبدا لله وحده وانه مسئول عن اختياره
لديانته ايا كانت وانه بالقطع ان كبر هذا الطفل
في كنف اسرة مسيحية وهو حر واختار الاسلام
بعد ذلك سيكون مسلما صالحا
اما ان نشأ كعبد غير حر في اختيار دينه
فلا احد يستطيع ان يجزم باخلاصه لديانته التي نشأ عليه
ده معنى الكلام
لكن الجملة اللي فاكراها كويس: الحرية هي اصل الانسان
وعلة خلقه
الكلام ده من الف سنة
احنا بنتقدم واللا بنتأخر؟
=====
اندور وماريو مسيحيين
بايمانهم مسيحيين
بواقعهم مسيحيين
بنص الشريعة الاسلامية
مسيحيين
بالعقل والانسانية
مسيحيين
واندرو وماريو
احسن مسيحيين في الدنيا
واكتر ناس في الدنيا
شفتهم بيحترموا ديني
وبيقدروه
على راسي واحتراماتي
لاندرو وماريو ووالدتهم
اللي بيحترموا الاخرين وعقائدهم
ومش طالبين اكتر من ان المجتمع
والقانون يبادلهم نفس الاحترام
كتير ده؟
جبهة التهييس الشعبية